Krista nun mawi- "Thu awih"

“….Nun ze mawi, Lal Krista nun mawi tak kha, nitin min zirtir ang che” tia Dr. Ramdinthara Sailo-in Thlarau Thianghlim a sawmna hla hian min hneh hle ṭhin.

Krista nun mawi han tih hian chi hrang engemaw zah a awm thei ang. Tun ṭumah hian Krista nun ze mawi zinga mi ‘Thuawihna’ chungchang hi han thlur bing ila.

Thu awih han tih hian tuemaw tirtu a awm avang emaw, dan zam sa avang emaw, chanvo nei tura ruat vang emaw-tea chu thupek emaw, dan emaw,
chanvo emaw zawma thawh (tih) hi a ni a tih theih ang. Thu awih tur chuan min tirtu duh dan leh duh zawng eng nge a nih kan hriat chian hmasak a ṭul phawt ang a, inngaihtlawm a ngai a, taimak a ṭul a, huaisen a ngai bawk. Thu awih tura kan chet chhuah phur leh phur loh chu min tirtu emaw, dan zamtu emaw kan zah danah leh kan tih danah te, a ṭhenah chuan kan hmangaih dan a zirte pawh a ni. Thu awih zia hi mitin nuna bet tel vek a ni a; mimal a zirin a danglam a ni chauh a, keimahni ṭheuh duhthlan azirah a innghat lian hle a ni.

Thu awih hian nun a tinuam a, nun a tizalen a, inrintawnna a thlen thei a, rinawmna chi a kui ṭiak thei bawk. Tin, thu awih hian lawman engemaw puanhnuai duhawm tak a nei ṭhin. Nu leh pa thu zawm chu damreina a ni a, zirtirtute thu zawm chu zirlai tan hlawhtlinna a ni. Kan Lalpa Isua Kristan “I thu ni se” tia ṭawngṭaiin, a Pa thu a zawm a, chhandam kan nih phah anih hi. Israel fate chunga lalte leh roreltute chanchinah chuan, Pathian thupek zawma Amah ṭihtute chuan ro an rel rei zel a ni tih kan hmu bawk. Thu awih thei mite chu mi fak kai leh chawimawi phu an ni tlangpui a; hmuingilna leh hamṭhatna an dawng ṭhin. Heti ang hi ni mah se la, mi chung chuang leh mi bik an ni lem lova, an tih tur, an kuta awm an hlen chhuah ṭhin avang a ni chauh zawk. Thu awih hian natna leh sualna tam tak lak aṭangin min veng thei bawk. Thu awih loh rah aṭangin thu awih ṭhatna a lang fiah leh zual a ni.

Isua Krista hniakhnung kan zuina kawngah a pawimawh berte zinga mi pawh thuawihna hi a ni. Krista nena kan inkarah hian hmangaihna leh thuawihna hi a induh tawn a, lak hran hleih theih a ni lo. Hmangaihnaa min zawng chhuaktu hi hmangaihna nen vek lo chuan a thupekte zawma zui theih a ni lo. Amah kan hmangaih dan azirin a thupek kan awih ang. “Nangnin min hmangaih chuan ka thupekte in zawm ang,” (Joh. 14:15) Isuan a ti si a.

[4.5.2003, Challenger, Vol. No. XX, Issue No. 18]